തൃശൂർ: ചേലക്കര താലൂക്ക് ആശുപത്രിയിൽ ഒപിയിൽ കയറി ഡോക്ടറോട് കയർത്ത് സംസാരിച്ച സംഭവത്തിൽ നിലമ്പൂർ എംഎൽഎ പിവി അൻവറിനെതിരെ കേസെടുത്ത് പൊലീസ്. അനുവാദമില്ലാതെ ആശുപത്രിയിൽ എത്തി ഡോക്ടറുടെ ജോലി തടസ്സപ്പെടുത്തിയതിന് ചേലക്കര പൊലീസാണ് കേസെടുത്തിരിക്കുന്നത്. താലൂക്ക് ആശുപത്രി സൂപ്രണ്ട് ഡോ. സുനിൽകുമാർ നൽകിയ പരാതിയിലാണ് കേസ്.
എംഎൽയഎയ്‌ക്കെതിരെ ആശുപത്രി സംരക്ഷണ നിയമപ്രകാരം കേസെടുക്കണമെന്ന് ആവശ്യപ്പെട്ടാണ് ഡോ. കെആർ അനിൽകുമാർ പരാതി നൽകിയത്. ചൊവ്വാഴ്ച രാവിലെയാണ് കേസിനാസ്പദമായ സംഭവം നടന്നത്. ഡിഎംകെ സ്ഥാനാർഥി എൻകെ സുധീറിനും അനുയായികൾക്കുമൊപ്പമെത്തിയ അൻവർ എംഎൽഎ ആശുപത്രിയിലെത്തി ഒപിയിലുണ്ടായിരുന്ന ഡോക്ടർ സെബാസ്റ്റ്യനോട് തട്ടിക്കയറുകയും ആശുപത്രി ജീവനക്കാരോട് മോശമായി സംസാരിക്കുകയും ചെയ്‌തെന്നാണ് പരാതി. അറ്റൻഡൻസ് രജിസ്റ്റർ പരിശോധിക്കാൻ അനുമതിയില്ലാതിരുന്നിട്ടും അൻവർ രജിസ്റ്റർ പരിശോധിച്ചുവെന്നും പരാതിയിൽ പറയുന്നു.
‘താൽകാലിക ഡോക്ടറുടെ അറ്റൻഡൻസ് മറ്റൊരു ബുക്കിലായിരുന്നു. ഇത് കാണാതെയാണ് അൻവർ ഡോക്ടർ ഇല്ല എന്ന നിഗമനത്തിലെത്തിയത്. ഔദ്യോഗിക കൃത്യനിർവഹണം തടസപ്പെടുത്തിയതിനും രോഗികളുടെ സ്വകാര്യത ഹനിക്കുന്ന രീതിയിൽ ചിത്രീകരണം നടത്തിയതിനും അൻവറിനെതിരെ കേസെടുക്കണം’ എന്നാണ് സൂപ്രണ്ടിന്റെ പരാതി. സംഭവസമയത്തെ ദൃശ്യങ്ങൾ ശേഖരിച്ച് പൊലീസ് അന്വേഷണമാരംഭിച്ചു. സംഭവത്തിൽ പി വി അൻവറിനെതിരെ സർക്കാർ ഡോക്ടർമാരുടെ സംഘടന രംഗത്തെത്തിയിരുന്നു.
