മലപ്പുറം: കാപ്പ നിയമലംഘനം നടത്തി നാട്ടിൽ തിരിച്ചെത്തിയ പ്രതിയെ പോലീസ് അറസ്റ്റ് ചെയ്തു. പേരശന്നൂർ സ്വദേശി അഷ്റഫലിയെയാണ് വളാഞ്ചേരി പോലീസ് പിടികൂടിയത്. ജില്ലയിലെ വിവിധ കേസുകളിലെ പ്രതിയാണ് പിടിയിലായ പേരശന്നൂർ സ്വദേശി കട്ടച്ചിറ ഹൗസിൽ അഷ്റഫലി. നിരവധി ക്രിമിനൽ കേസിൽ ഉൾപ്പെട്ട ഇയാളെ ജില്ലയിൽ നിന്നും എസ്പിയുടെ നേതൃത്വത്തിൽ പുറത്താക്കിയതായിരുന്നു. എന്നാൽ ഇതിന് പിന്നാലെ കഴിഞ്ഞ ദിവസം യുവാവ് നാട്ടിൽ തിരിച്ചെത്തി. ഇത് ശ്രദ്ധയിൽപ്പെട്ട വളാഞ്ചേരി പോലീസ് പ്രതിയെ അറസ്റ്റ് ചെയ്യുകയും കോടതിയിൽ ഹാജരാക്കുകയും ചെയ്തു. പിടിയിലായ പ്രതി ഇതിനു മുൻപും മൂന്നുതവണ കാപ്പ നിയമലംഘനം നടത്തിയിട്ടുണ്ട്.
