സി പി ഐ എം 24ആം പാർട്ടി കോൺഗ്രസ് കൊടിയേറി. മുതിർന്ന പാർട്ടി അംഗമായ ബിമൻ ബസുവാണ് പതാക ഉയർത്തിയത്. തമിഴ്‌നാട്ടിലെ മധുരയിൽ ഏപ്രിൽ 2 മുതൽ ഏപ്രിൽ 6 വരെയാണ് കോൺഗ്രസ് നടക്കുക. പോളിറ് ബ്യൂറോ കോർഡിനേറ്റർ പ്രകാശ് കാരാട്ട് സമ്മേനം ഉദ്‌ഘാടനം ചെയ്യും. പി ബി അംഗം ബി വി രാഘവലു സംഘടനാ റിപ്പോർട്ട് അവതരിപ്പിക്കും. ഉദ്ഘാടന സമ്മേളനത്തിൽ സിപിഐ ജനറൽ സെക്രട്ടറി ഡി രാജ ഉൾപ്പെടെ വിവിധ ഇടതുപാർട്ടി പ്രതിനിധികൾ പങ്കെടുക്കുന്നുണ്ട്.
കേരളത്തിലെ അധികാരം നിലനിർത്തുന്നതിനൊപ്പം ദേശീയ പാർട്ടി സംഘടനാപരമായി കൂടുതൽ ശക്തിപ്പെടുന്നതിനുള്ള സുപ്രധാന തീരുമാനങ്ങളാകും സി പി ഐ എം പാർട്ടി കോൺഗ്രസിൽ ഉണ്ടാവുക. പാർട്ടിയെ നയിക്കാൻ ഇനിയാര് എന്നതാവും പ്രധാന ചർച്ച. സിപിഐഎം ജനറൽ സെക്രട്ടറി സ്ഥാനം ഏറ്റെടുക്കാനില്ലെന്ന് പ്രകാശ് കാരാട്ട് വ്യക്തമാക്കിയിരുന്നു. മൂന്ന് ടേം പൂർത്തിയായതിനാൽ മാറി നിൽക്കുമെന്ന് പ്രകാശ് കാരാട്ട് റിപ്പോർട്ടറിന് നൽകിയ അഭിമുഖത്തിൽ പറഞ്ഞിരുന്നു. പാർട്ടി സെക്രട്ടറി ആരാണെന്ന് 6-ന് മാത്രമേ അറിയൂവെന്ന് സിപിഐഎം സംസ്ഥാന സെക്രട്ടറി എം വി ഗോവിന്ദൻ പ്രതികരിച്ചു. പ്രായപരിധി ഇളവ് പാർട്ടി തീരുമാനിക്കുമെന്നും പ്രകാശ് കാരാട്ടിനും ബൃന്ദ കാരാട്ടിനും പ്രായപരിധിയിൽ ഇളവ് ഉണ്ടാകില്ലെന്നും അദ്ദേഹം പറഞ്ഞു.
