തൃശൂർ കോൺഗ്രസിലെ അസ്വാരസ്യങ്ങൾ വീണ്ടും പോസ്റ്ററുകളായി പുറത്തേക്ക്. തൃശ്ശൂരിലെയും ആലത്തൂരിലെയും തോൽവി പരിശോധിക്കുന്ന കെപിസിസിയുടെ അന്വേഷണ റിപ്പോർട്ട് പുറത്തുവിടണമെന്നും കുറ്റക്കാർക്കെതിരെ നടപടി എടുക്കണമെന്നുമാണ് കോൺഗ്രസ് കൂട്ടായ്മ എന്ന പേരിൽ വന്ന പോസ്റ്ററിലെ ആവശ്യം. ലോക്സഭാ തിരഞ്ഞെടുപ്പിൽ തൃശൂരിൽ കെ മുരളീധരൻ പരാജയപ്പെട്ടപ്പോളും സമാനമായ രീതിയിൽ ഡിസിസിക്ക് മുൻപിൽ പോസ്റ്ററുകൾ പ്രത്യക്ഷപ്പെട്ടിരുന്നു. കെ മുരളീധരന് വേണ്ടി അവസാന നിമിഷം വഴിമാറികൊടുത്ത ടി എൻ പ്രതാപനെതിരെയായിരുന്നു അന്ന് പോസ്റ്ററുകളിലൂടെ പ്രതിഷേധങ്ങൾ അറിയിച്ചത്.
തോൽവി പരിശോധിക്കാൻ കെപിസിസി ഒരു അന്വേഷണ കമ്മീഷനെ നിയോഗിക്കുകയും അതിന്റെ ഭാഗമായി കെ സി ജോസഫും ആർ ചന്ദ്രശേഖരനും തൃശൂർ ഡിസിസിയിലെത്തി വിവരങ്ങളും ശേഖരിച്ചിരുന്നു. ഡിസിസി ഓഫിസിലെ കൂട്ടത്തല്ലും പിന്നാലെ ഡിസിസി അധ്യക്ഷൻ ജോസ് വെള്ളൂർ രാജിവെച്ചതും എല്ലാം അതുമായി ബന്ധപെട്ടു നടന്നിരുന്നു. ഈ അന്വേഷണ റിപ്പോർട്ട് എത്രയും വേഗം പുറത്തുവിടണമെന്നാണ് പുതിയ പോസ്റ്റർ പതിച്ചവരുടെ ആവശ്യം. പാർട്ടി ഐക്യം ശക്തിപ്പെടുത്തേണ്ട ആവശ്യം ഏറ്റവും മുഖ്യമായി പരിഗണിക്കേണ്ടുന്ന ഈ സമയത്തു പോസ്റ്റർ യുദ്ധം കോൺഗ്രസിൽ ഒരു ടീര തലവേദനയായി തുടരുന്നു.
