കുവൈത്ത് സിറ്റി:യു.എൻ സുരക്ഷാ കൗൺസിൽ അന്തരിച്ച കുവൈത്ത് അമീർ ശൈഖ് നവാഫ് അൽ അഹമ്മദ് അൽ ജാബിർ അസ്സബാഹിന് ആദരാഞ്ജലി അർപ്പിച്ചു. സമ്മേളനത്തിനിടെ അംഗങ്ങൾ ഒരു മിനിറ്റ് എഴുന്നേറ്റുനിന്ന് മൗനം ആചരിച്ചു.
ശൈഖ് നവാഫ് ഗൾഫ് മേഖലയിലും അതിനുപുറത്തും സഹകരണത്തിനും സ്ഥിരതക്കും സംഭാവന നൽകുകയും മേഖലയിലും ലോകമെമ്പാടുമുള്ള സമാധാനത്തിനും പിന്തുണ നൽകുകയും ചെയ്ത വിശിഷ്ട രാഷ്ട്രതന്ത്രജ്ഞനാണെന്ന് യു.എൻ വിശേഷിപ്പിച്ചു. അന്തരിച്ച അമീറിനോടുള്ള ബഹുമാനാർഥം യു.എൻ ന്യൂയോർക് ആസ്ഥാനത്ത് തിങ്കളാഴ്ച പതാക പകുതി താഴ്ത്തി.
