ഡീന്‍ കുര്യാക്കോസ് പന വളച്ചുകെട്ടി ഹീറോ ആകാന്‍ ശ്രമിക്കുന്നു : സി വി വർ​ഗീസ്

ഇടുക്കി : എംപി ഡീന്‍ കുര്യാക്കോസിനെ രൂക്ഷമായി വിമർശിച്ച് സിപിഐഎം ജില്ലാ സെക്രട്ടറി സി വി വർ​ഗീസ്. ഡീൻ കുര്യാക്കോസ് പാഴ്ജന്മമാണെന്നും ബാഹുബലിയിലെ പ്രഭാസ് ആകാൻ ശ്രമിക്കുന്നുവെന്നും അദ്ദേഹം വിമർശിച്ചു. പന വളച്ചുകെട്ടി ഹീറോ ആകാന്‍ പറ്റാത്ത സാഹചര്യത്തില്‍ ചെറുതോണിയുടെ പാലം വളച്ചു കെട്ടി നിര്‍വൃതി കൊള്ളുന്നു. അടുത്ത നിയമസഭാ തെരഞ്ഞെടുപ്പില്‍ പി ജെ ജോസഫിന്റെ തൊടുപുഴ മണ്ഡലവും എല്‍ഡിഎഫ് തിരിച്ചുപിടിക്കുമെന്നും സി വി വര്‍ഗീസ് വ്യക്തമാക്കി. കഴിഞ്ഞ ദിവസം എംഎം മണിയെ വിമർശിച്ച് ഡീൻ കുര്യാക്കോസ് രം​ഗത്ത് വന്നിരുന്നു. എംഎം മണി ഇടുക്കിക്ക് അപമാനനവും അധിക ബാധ്യതയുമാണെന്നും, ‌മണിയുടെ ചെലവിലല്ല ഇടുക്കിയിലെ ജനപ്രതിനിധികള്‍ ജീവിക്കുന്നതെന്നും ഡീന്‍ പരിഹസിച്ചു. സ്പൈസസ് പാര്‍ക്കിന്റെ ഉദ്ഘാടനത്തില്‍ പിജെ ജോസഫ് എംഎല്‍എ പങ്കെടുക്കാത്തതിനെതിരെ എംഎം മണി രൂക്ഷമായി പ്രതികരിച്ചിരുന്നു. ഇതിനെതിരെയാണ് ഡീന്‍ കുര്യാക്കോസിന്റെ മറുപടി.