ഡൽഹി നിയമസഭാ തെരെഞ്ഞെടുപ്പ് നടക്കാനിരിക്കെ പ്രകടന പത്രിക പുറത്തിറക്കി ആം ആദ്മി. ‘കെജ്‌രിവാൾ കി ഗ്യാരന്റി’ എന്ന തലക്കെട്ടിൽ നിലവിൽ സർക്കാർ നൽകുന്ന സൗജന്യങ്ങൾ നിലനിർത്തി കൂടുതൽ വാഗ്ദാനങ്ങളുമായാണ് എ എ പി രംഗത്ത് വന്നിരിക്കുന്നത്.
ഡൽഹിയിലുള്ള എല്ലാവര്ക്കും തൊഴിൽ എന്നതാണ് ഏറ്റവും മുഖ്യമായ വാഗ്ദാനം. രണ്ട് ശതമാനം തൊഴിൽ രഹിതരാണ് നിലവിൽ ഡൽഹിയിൽ ഉള്ളത്. ഇവർക്ക് കൂടി തൊഴിൽ നൽകി, തൊഴിലില്ലായ്മ തുടച്ചുനീക്കുക എന്നതാണ് കെജ്‌രിവാളിന്റെ ലക്ഷ്യം. മാസം 2100 രൂപ വീതം വനിതകൾക്ക് നൽകുന്ന ‘മഹിളാ സമ്മാൻ യോജന’ അധികാരത്തിലേറിയാൽ എത്രയും പെട്ടന്ന് തന്നെ നടപ്പിലാക്കും. 60 വയസിന് മുകളിലുളള വയോജനങ്ങൾക്ക് എല്ലാ ആശുപത്രികളിലും മികച്ച ചികിത്സ, സൗജന്യമായി വെള്ളം, ദളിത് വിദ്യാർത്ഥികളുടെ വിദേശ പഠനം ഏറ്റെടുക്കൽ, മെട്രോയിൽ വിദ്യാർത്ഥികൾക്ക് 50% സബ്‌സിഡി, സൗജന്യ ബസ് യാത്ര എന്നിങ്ങനെ നീളുന്നു പത്രികയിലെ പ്രഖ്യാപനങ്ങൾ.
ഫെബ്രുവരി 5നു തെരഞ്ഞെടുപ്പും ഫെബ്രുവരി 8നു വോട്ടെണ്ണലും നടക്കും. ഒറ്റ ഘട്ടമായാണ് എല്ലാ സീറ്റുകളിലേക്കുമുള്ള തെരെഞ്ഞെടുപ്പ് നടക്കുക. ജനുവരി 17 ആണ് നാമനിര്‍ദ്ദേശ പത്രിക സമര്‍പ്പിക്കാനുള്ള അവസാന തീയതി പത്രികകളുടെ സൂക്ഷപരിശോധന ജനുവരി 18ന് നടക്കും. പത്രിക പിന്‍വലിക്കാനുള്ള അവസാന തീയതി ജനുവരി 20 ആണ്.
