വൈക്കം: യുവാവിനെ കൊലപ്പെടുത്താൻ ശ്രമിച്ച കേസിൽ മൂന്നുപേരെ അറസ്റ്റ് ചെയ്തു. ഉല്ലല കടക്കാംപുറത്ത് വീട്ടിൽ കിഷോർ (21), ഉല്ലല മഠത്തിൽ വീട്ടിൽ എം.എസ്. അഭിജിത്ത് (21), ഉല്ലല കൂവംഭാഗത്ത് കുഴിക്കണ്ടത്തിൽ വീട്ടിൽ ബിനിൽ (21) എന്നിവരെയാണ് വൈക്കം പൊലീസ് അറസ്റ്റ് ചെയ്തത്.
തലയാഴം സ്വദേശിയായ യുവാവിനെ ജനുവരി 29നാണ് സംഘംചേർന്ന് കൊലപ്പെടുത്താൻ ശ്രമിച്ചത്. യുവാവിന്റെ സുഹൃത്തിനെ കൊതവറ എം.സി മുക്ക് ഭാഗത്തുവെച്ച് യുവാക്കൾ മർദിക്കുകയായിരുന്നു.
തടയാൻ ശ്രമിച്ച യുവാവിനെ സംഘം ചേർന്ന് മർദിക്കുകയും വടികൊണ്ട് യുവാവിന്റെ തലക്കടിക്കുകയുമായിരുന്നു. തുടർന്ന് സംഭവസ്ഥലത്തുനിന്ന് കടന്നുകളഞ്ഞു. പരാതിയെത്തുടർന്ന് വൈക്കം പൊലീസ് കേസെടുക്കുകയും പിടികൂടുകയുമായിരുന്നു. കോടതിയിൽ ഹാജരാക്കിയ മൂവരെയും റിമാൻഡ് ചെയ്തു.#crime
