വഖഫ് ഭേദഗതി ബില്ലിലെ ചര്‍ച്ചയില്‍ പങ്കെടുക്കാതിരുന്ന കോണ്‍ഗ്രസ് എംപിമാരായ പ്രിയങ്ക ഗാന്ധിയെയും രാഹുല്‍ ഗാന്ധിയെയും വിമര്‍ശിച്ച് സമസ്തയുടെ മുഖപത്രം. വഖഫ് ബിൽ ചര്‍ച്ചയില്‍ ലോക്‌സഭയില്‍ വയനാട് എംപി പ്രിയങ്ക എത്താതിരുന്നത് കളങ്കമായെന്നാണ് സുപ്രഭാതത്തിലെ എഡിറ്റോറിയലില്‍ വിമർശിച്ചിരിക്കുന്നത്. ഇനി നിയമപോരാട്ടത്തിന്റെ കാലമെന്ന തലക്കെട്ടോടെയുള്ള മുഖപ്രസംഗത്തിലാണ് ഇരു നേതാക്കള്‍ക്കുമെതിരെ സമസ്ത വിമര്‍ശനം ഉന്നയിച്ചത്.
മുസ്‌ലിങ്ങളുടെ ഭരണഘടനാ അവകാശങ്ങൾക്കെതിരെ കരങ്ങൾ ഉയർന്നപ്പോൾ പ്രിയങ്ക എവിടെ ആയിരുന്നുവെന്ന ചോദ്യം എക്കാലവും മായാതെ നില്‍ക്കും. രാജ്യത്തിന്റെ ഐക്യം തകര്‍ക്കുന്ന ബില്ലില്‍ ലോക് സഭ പ്രതിപക്ഷ നേതാവ് എന്തുകൊണ്ട് സംസാരിച്ചില്ലെന്ന ചോദ്യവും ഉയര്‍ന്നുതന്നെ നില്‍ക്കുമെന്നും രാഹുല്‍ ഗാന്ധിക്കെതിരെ സുപ്രഭാതം പറയുന്നു. വഖഫ് ബില്ലിനെ ഇരു സഭകളിലും എതിർത്ത പ്രതിപക്ഷ അംഗങ്ങൾക്കുള്ള നന്ദിയും സുപ്രഭാതത്തിലൂടെ അറിയിക്കുന്നുണ്ട്.
