ഇനി യാത്രചെയ്യുമ്പോൾ സ്ഥലം അറിയില്ല എന്ന ഭയം വേണ്ട. എവിടെ എത്തി എന്ന് ഫോൺ നോക്കി കണ്ടുപിടിക്കാം. തീവണ്ടിയാത്രക്കാർ ആദ്യമേ ഈ സൗകര്യം അനുഭവിച്ചവരാണ്. ട്രെയിൻ എവിടെ എത്തി എന്ന് സ്മാർട്ട് ഫോണിലൂടെ നോക്കിയാണ് നാം പലപ്പോഴും യാത്രക്കൊരുങ്ങുക. ആ സൗകര്യമാണ് ഇനിമുതൽ കെഎസ്ആർടിസി ബസിലും വരാൻ പോകുന്നത്.
ബസിന്റെ സഞ്ചാരപാത അറിയാനും യാത്ര ബുക്കുചെയ്യാനുമുള്ള ചലോ ആപ്പ് ഉടൻ പുറത്തിറങ്ങുമെന്ന് മന്ത്രി കെ ബി ഗണേഷ് കുമാർ. കെഎസ്ആർടിസി മൂന്നുമാസത്തിനുള്ളിൽ പൂർണമായും ഡിജിറ്റൽവൽക്കരിക്കും. ആൻഡ്രോയ്ഡ് ടിക്കറ്റ് മെഷീൻ രണ്ടുമാസത്തിനുള്ളിൽ നടപ്പാക്കും. ഭാവിയിൽ ബസിനുള്ളിൽ ലഘുഭക്ഷണം ഓർഡർ ചെയ്ത് എത്തിക്കാനുള്ള സൗകര്യവുമൊരുക്കുമെന്നും ഗണേഷ് കുമാർ പറഞ്ഞു. കേരള ലിറ്ററേച്ചർ ഫെസ്റ്റിവലിൽ ‘പൊതുഗതാഗതം: നാം മുന്നേറേണ്ടത് എങ്ങനെ’ എന്ന സെഷനിൽ സംസാരിക്കുകയായിരുന്നു മന്ത്രി.
ഒന്നാംതീയതി തന്നെ ജീവനക്കാർക്ക് ശമ്പളം വിതരണംചെയ്യുന്ന പദ്ധതി തയ്യാറാക്കി. ഒരു ഫയലും അഞ്ചുദിവസത്തിൽ കൂടുതൽ പിടിച്ചുവയ്ക്കരുതെന്ന് KSRTC, മോട്ടാർവാഹന വകുപ്പുകളോട് നിർദേശിച്ചിട്ടുണ്ട്. മോട്ടോർവാഹന ഉദ്യോഗസ്ഥർക്ക് ടാബ് വിതരണംചെയ്യും. ലൈസൻസ് ഉടൻ ഫോണിൽ ലഭ്യമാക്കുന്നതിനാണിത്. ഡ്രൈവിങ് ടെസ്റ്റ് കാമറയിൽ ചിത്രീകരിക്കുന്നതും ആലോചനയിലുണ്ടെന്നും മന്ത്രി പറഞ്ഞു.
